Artfilm.mn буюу кино урлагын цоо шинэ сайт мэндэллээ ( Arthouse,Independent )

Өөрийн дотны танил Дөлгөөний санаачлан Алтан хальс холбооны киночид хамтран (Энхбат, Ike ... ) хийсэн нэгэн кино урлагын сайтыг та бүхэнд танилцуулхыг хүслээ, Миний бие сайтыг өөрийн биеээр турших эхний 10 хүний нэг байсан ба уг сайтын хувьд маш өндөр сэтгэгдэлтэй байгаагаа хэлмээр байна. За тэгээд доорх тайлбарыг уншиж сонирхоорой хүсвэл beta invitation авах боломжтой шүү, кино урлагын нэгэн томоохон сайт бий болсоныг зарлахдаа тун сэтгэгдэл өндөр байна.


Сайн байцгаана уу,

"Алтан хальс" холбооны дараагийн томоохон төсөл болох artfilm.mn вэбсайтыг танилцуулж байна. Энэхүү кино урлагийн нэгдсэн лавлах, кино сонирхогчдийн уулзах газар болох вэбсайтыг босгох гэж зориг шулуудаад даруй хагас жил гаруйн нүүрийг үзжээ. Цөөхөн сайн дурын хүмүүсээс бүрдсэн баг маань чансаатай мэдээлэл бүрдүүлэх гэсээр ийн удсан хэрэг.

Dreamers' Day өдөрлөгийг зохион байгуулаад хоёр жил болох гэж байна уу даа. Энэ хугацаанд блог бичиж ирээдүйн вэбсайтдаа мэдээлэл базааж байлаа.

Яг одоо "private beta" буюу "хаалттай үзлэг" шатандаа яваа бөгөөд 6 сарын 11-нд бэта хувилбараар нээх юм. Та урьдчилан бүртгүүлэх боломжтой.

За олон үг нуршилгүй вэбсайтаа хуудас хуудсаар нь танилцуулсугай.

Кино
Киноны хуудсанд тухайн кино хэдэн онд гарсан, дүрүүд нь ямар ямар хэлээр хэлэлцдэг, аль улсад хийгдсэн, киноны үргэлжлэх хугацаа, дүрсний өнгө (Хар цагаан кино ч ховордож дээ?), төрөл гэсэн үндсэн мэдээллээс гадна оролцсон уран бүтээлчид, тухайн кинотой холбоотой кинонуудыг үзэж болно. Аан тийм, киноны трэйлэрийг үзэж болно.

Киноны нэрийг орчуулахдаа жинхэнэ нэрийг дор нь тавьсан байгаа. Уран бүтээлчийн нэр ч мөн ялгаагүй.

Уран бүтээлч

Уран бүтээлчийн хуудсанд нэр ус, төрсөн он, эшлэл байхаас гадна тухайн уран бүтээлчийн бүтээсэн чансаатай бүтээлүүдийг он цагийн дарааллаар харуулсан нь буй. Ингэхдээ, жишээ нь, Күбрик найруулагчийн зөвхөн найруулсан бүтээлүүд бус, мөн продюсерлэсэн, зохиолыг нь бичсэн гэх мэт бүх оролцон бүтээсэн кино орно.

Төрөлжүүлсэн хуудсууд
Гарсан он, бүтээгдсэн улс, хэлэлцдэг хэл, төрөл дээр дарвал тухайн зүйлтэй холбоотой кинонуудын жагсаалт гарах болно. Жишээ нь дээрх зурган дээрх 1972 дээр дарвал 1972 онд гарсан кинонуудын жагсаалт гарна. Энэ мэтчилэн "Орос улсад бүтээгдсэн кинонууд", "Франц хэлээр бүтээгдсэн кинонууд", "Баримтат кинонууд" гэсэн хуудсууд байна.

Жагсаалт 
Кино олоход дээр байгаа шиг улс орон, хэл яриа, он цаг хангалтгүй. Харин "Францын шинэ давалгаа", "Дуугүй киноны үе", "Андрей Тарковскийн дуртай 10 кино", "Ингмар Бергманы шүтдэг 5 кино" гэж кинонуудыг жагсаавал сонирхолтой биш гэж үү? Одоогийн байдлаар "Шилдэг 200", "ХХI зууны шилдэг 50", "Монгол кино" зэрэг жагсаалт үүсээд байгаа.

Кино ол...
Хэрэв киноны нэрийг, эсвэл нэрийнх нь хэсгийг л мэддэг бол хайлтын цонхыг ашиглан киногоо олж болно.

Тусламж
Цаашид вэбсайтыг улам гоё болгоход тусламж хэрэгтэй буйгаа нуух юун. Бидэнд чиглэл чиглэлийн "сайн дурын уран сайханчдын" уран гар дутагдаж байна.

• Дизайнер - Вэб дизайн, анимаци, 3D гээд аль ч чиглэлээр ажилладаг байсан болно.
• Орчуулагч, сэтгүүлч - Вэбсайтыг мэдээллээр дүүргэх кинонд дуртай бичгийн улс.
• Вэб програмист - HTML/CSS/JS-ын мэдлэгтэн.

Бидэнтэй хамтран ажиллаж монгол хэлээрх кино урлагийн толь бичихийг хүсвэл холбоо бариарай. Цахим шуудангийн хаяг: dolugen [at] artfilm.mn

Кино урлагийн толь

artfilm.mn вэбсайтыг ингэж тодорхойлоход буруудахгүй болов уу.

Одоогоор 1000 гаруй кино, 2000 гаруй уран бүтээлчийн мэдээлэл орсон байгаа бөгөөд цаашид 50000 киноны мэдээлэлтэй болох зорилго тавиад байна. Том тоо шүү. Дэлхий даяар дуулж сонсоогүй хачин сонин, "хүн болж төрөөд үзэх ёстой" кино олон байна. Тэр бүгдийг кино урлагийн тольдоо тусгах болно. Мөн нэмж сайжруулах зүйлс ч олон бий. Үүнд туслах хүмүүсийн нэг та гэж найднам.